Main » 2012 » хоёрдугаар сар » 15 » 2012 гарсаар хоёр сар гаруй хугацаанд олныг цочирдуулсан дуулиант хэргүүд хэд хэдэн удаа гараад байна.
11:17 AM
2012 гарсаар хоёр сар гаруй хугацаанд олныг цочирдуулсан дуулиант хэргүүд хэд хэдэн удаа гараад байна.

"Дижитал”-ын Баавар хар тамхины хэргээр саатуулагдав

Эрүүгийн цагдаагийн газар, УМБГ-ын хамтарсан ажлын  өнгөрөгч нэгдүгээр сард Хип хоп холбооны тэргүүн Баавар  буюу Ш.Батбаяр, н.Алтай  /37 настай, эрэгтэй/ нарыг  мансууруулах төрлийн бодис хэрэглэсэн байхад нь цагдаагийнхан саатуулсан. Ш.Батбаярын гэрт нэгжлэг хийхэд хар тамхины төрлийн зүйл олджээ. Тэрбээр өдгөө цагдан хоригдож байгаа бөгөөд цагдаагийнханд өгсөн мэдүүлэгтээ хар тамхи хэрэглэдэг болохоо хүлээсэн байна. Түүний гэрээс олдсон хар тамхины төрөл, зүйлийг  шинжлүүлэхээр шүүхийн шинжилгээний төвд өгөөд байгаа юм.  Уг хэрэгт холбогдсон 37 настай Алтай гэгч нь "мөс” гэж нэрлэх мансууруулах төрлийн бодисыг насанд хүрээгүй хүүхдүүдэд  худалдсан байж болзошгүй гэнэ. Уг хэрэгт сэжигтнээр саатуулагдсан залуусын "мөс” гээд байгаа зүйлийг шүүхийн шинжилгээний төвд шинжлүүлэхээр өнөөдөр явуулсан байна. Хамгийн сүүлийн мэдээллээр  Баавар нарын өмгөөлөгч батлан даалтад гаргахыг хүссэн ч шүүх үргэлжлүүлэн хорихоор болсон юм.

Монголбанкны ажилтнуудыг  саатууллаа

Монголбанкнаас их хэмжээний алт алдагдаж, уг хэрэгт  Монголбанкны нягтлан бодогч н.Цагаанхүүг сэжигтнээр тооцон цагдан хориод байгаа. Энэ талаар нийслэлийн Прокурорын орлогч Е.Сагсайгаас тодруулахад "Монголбанкны Эрдэнэсийн сангаас 20 кг орчим алт алдагдсан тухай  асуудлаар УМБГ-ын  Эдийн засгийн гэмт хэрэг мөрдөх хэлтсээс эрүүгийн хэрэг үүсгэж, НПГ-аас мөрдөн байцаалтын ажиллагаанд хяналт тавьж ажиллаж байна. Энэ хэрэгт шалгавал зохих олон асуудал бий. 20 орчим кг алт алдагдсан гэдэг асуудал нэг өдөр хулгайлаад, завшсан асуудал биш. Энэ бол хэдэн жил дамжсан, сорьц тогтоодог, шинжлүүлдэг үйл ажиллагаатай холбоотой зүйл. Сорьц тогтоох, шинжлүүлэх явцад бага хэмжээгээр завшигдсан байж болзошгүй үйлдлүүд байгаа. Дөрвөн хүнийг цагдан хорих таслах сэргийлэх арга хэмжээ авч, мөрдөн байцаалтын ажиллагаа эхэлсэн. Монголбанкны Эрдэнэсийн сангийн ажилтнуудаас холбогдуулан шалгах  асуудал ч бий. Түүнчлэн Монголбанк болон бусад газарт алт  тушаадаг иргэн, байгууллагын үйл ажиллагаатай холбогдуулаад шалгах зүйл бий. Эдгээр шалгалтууд явагдаж эхэлж байна. Шалгана, тогтоосны дараа  хэн үйлдсэн, ямар хэмжээний алт  дутсан, тэр нь хэний үйл ажиллагаатай холбоотой байсан нь нийтэд ил тод болох учиртай” гэв.

Монголбанкны Эрдэнэсийн сангаас 2003-2011 оны хооронд удаа дараагийн үйлдлээр их хэмжээний алт дутагдсан нь мөрдөн байцаалтын явцад тогтоогджээ.  Монголбанк алтаа гадаадад шүүлгэж цэвэршүүлдэг юм байна. Улмаар гулууз, гулдмай болгож оруулж ирэх явцад сэжигтэн этгээдүүд алтнаас бага багаар авсаар 18 кг-д хүрсэн байх магадлалтай аж. Одоогоор мөрдөн байцаалтын ажиллагаа үргэлжилж байгаа бөгөөд хэн хэн хоригдсон талаарх мэдээллийг нууцалсаар байгааа юм.

Таван настай охиныг хөнөөсөн П.Сумъяажав дахин гэмт хэрэг үйлдлээ

Эгч, дүү 5-12 насны охидыг хүчирхийлж, нэгнийх нь амийг хөнөөсөн гэмт хэрэг үйлдсэн ч өршөөлийн хуулиар суллагдсан П.Сумъяажав он гарсны дараахан дахин гэмт хэрэг үйлдэж, хоригдоод байна. Тэрбээр энэ сарын эхээр Баянголдүүргийн тавдугаар хорооны нутаг дэвсгэрт үйл ажиллагаа явуулдаг ломбардыг 4-5 этгээдийн хамт бүлэглэн тоносон байна. П.Сумъяажав тэргүүтэй дээрх этгээдүүд 17-18 насных аж. Эх сурвалжийн мэдээллээр тэд удаа дараагийн үйлдлээр хэд хэдэн ломбард тоножээ. Тэдэнд эрүүгийн хуулийн 145.3 -т зааснаар буюу зохион байгуулалттай бүлэглэж үйлдсэн,  энэ хэргийн улмаас хохирогчийг амьдралын эх үүсвэрээс нь салгасан буюу их хэмжээний хохирол учруулсан гэх үндэслэлээр эрүүгийн хэрэг үүсгэн шалгаж байгаа. Хэрэв тэдний гэм буруутай нь тогтоогдвоо эд хөрөнгийг хурааж, хөдөлмөрийн хөлсний доод хэмжээг хоёр зуун тавин нэгээс таван зуу дахин нэмэгдүүлсэнтэй тэнцэх хэмжээний төгрөгөөр торгох,  эсвэл 5-10 жил  хүртэл хугацаагаар хорих ял шийтгэнэ гэж  заасан байна.

П.Сумъяжав нь  2009 оны хоёрдугаар сарын 14-ний өдөр шунахай сэдэлтээр Д.Бямбадоржтой урьдчилан үгсэн тохиролцож, Баянгол дүүргийн 19 дүгээр хороонд оршин суух иргэн О-гийн гэрээс  эд зүйл дээрэмдэх гэмт хэргийг зохион байгуулж, 11 сая 400 мянган төгрөг, "Коника” маркийн гэрэл зургийн аппарат зэргийг дээрэмдэх явцдаа таван настай Н-ийн хоолойг хэрчиж, амь насыг нь хөнөөжээ. Тэрбээр энэ гэмт хэрэгтээ Д.Бямбадоржийг өдөөн түлхэж оролцуулсан байна. Тэдэнд анхан шатны шүүхээс 15 жилийн хорих ял оногдуулсан давж заалдах шатнаас  Өршөөл үзүүлэх тухай хуулийн  4.1.5-д " Гэмт хэрэг үйлдэж анх удаа хорих ял шийтгүүлсэн 18 насанд хүрээгүй ялтны шүүхээс оногдуулсан ялын хугацааг харгалзахгүйгээр эдлээгүй үлдсэн үндсэн болон нэмэгдэл ялыг өршөөн хэлтрүүлнэ” гэж заасны дагуу ялыг өршөөн хэлтрүүлээд  байв.

"Хаан” банкинд буун дуу гарч  хүний амь эрсдэв

Налайх дүүргийн  "Хаан” банкны тооцооны төвд  энэ сарын 03-ны өдрийн 11.50 цагийн орчим  буун дуун гарч, хүний амь эрсэдсэн хэрэг гарсан. Гэмт этгээд тус тооцооны төвийн захирал н.Туяагийн нөхрийг хэвлийн тус газарт нь буудаж, улмаар мэс заслын дараа нас барсан юм. Дээрх ноцтой хэргийг Сонгинохайрхан дүүргийн харьяат 26 настай А.Бат-Ялалт гэгч үйлдсэн бөгөөд хэргийн  газраас зугтаж явахдаа баригдсан.  Гэмт этгээд Мөрдөн байцаалтын явцад өгсөн анхны мэдүүлэгтээ "Хэргийг үйлдэхээр урьдаас төлөвлөж, Налайх дүүрэг рүү такси хөлсөлж явсан. Өмнөх өдөр буюу өчигдөр буугаа бэлдсэн” гэжээ. Энэхүү хэргийг УМБГ-т шалгаж  байгаа бөгөөд Эрүүгийн хуулийн тусгай ангийн 91.2-т  зааснаар хүний амийг санаатай хөнөөсөн, 91.2.1-т зааснаар  шунахайн сэдэлтээр, 91.2.7-д заасан уулгалан довтлох замаар буюу дээрэмдэх гэмт хэргийг үйлдсэн, 91.2.11-т заасан бүлэглэн урьчилж үгсэн тохиролцож зохион байгуулалттайгаар  үйлдсэн, 91.2.16-д зааснаар хоёр буюу түүнээс дээш хүнийг хохироохыг завдсан гэх үндэслэлээр шалгаж байна. Мөн уг хэрэгт хамтран оролцож, бууг олж  авах, эд ангийг нь өөрчлөхөд тусалсан иргэн Э-г Эрүүгийн хуулийн 38-р зүйлд зааснаар  хэргийг үйлдэхэд хамтран оролцсон  гэдгээр сэжигтнээр тооцжээ. Эрүүгийн хуулийн 35-р зүйлд гэмт хэрэгт хамтран оролцогч гэдгийг  гэмт хэрэг үйлдэх аргыг  зааж зөвлөх, зэвсэг хэрэгсэл өгөх, учрах саадыг арилгах, унаа орон байраар хангах зэргээр гэмт хэрэг үйлдэхэд дэмжлэг үзүүлсэн мөн гэмт хэрэг үйлдсэн итгээд болон гэмт хэрэг үйлдсэн зэвсэг хэрэгслийг нуун дарагдуулсан зарж борлуулсан этгээдийг хамааруулна гэж заажээ.

Хөдөлгөөнт эргүүлийн ахлагч нарыг авлигын хэргээр хорьжээ

Хөдөлгөөнт эргүүлийн газар, эргүүл хамгаалатын газрын дөрвөн ахлагчийг саяхан  бусдаас авлига авсан байж болзошгүй гэх үндэслэлээр цагдан хорилоо. Улмаар нийслэлийн прокурорын зөвшөөрлөөр  өнгөрсөн баасан гаригт гэрт нь шалгалт хийхэд их хэмжээний бэлэн мөнгө байжээ. Хөдөлгөөнт эргүүлийн цаг­даа нар бусдаас авлига авсан байж болзошгүй тухай иргэдийн мэдээллийг ЦЕГ-ын Дотоод хяналт, шалгалт аюулгүй байдлын хэлтэс шалгаж тогтоосон ба эдгээр алба хаагчдыг ёс зүйн дутагдлаар цагдаагийн байгууллагаас халж, асуудлыг шалгуулахаар харьяаллын дагуу УЕП-ын газрын дэргэдэх Мөрдөн байцаах албанд материалыг шилжүүлээд байгаа юм. Эх сурвалжийн мэдээллээр  ахлагч нар Хятадын хөрөнгө оруулалттай компниас  авлига авсан бололтой.

 
Category: Нийгэм | Views: 566 | Added by: beatbox_battle | Tags: 2012 гарсаар хоёр сар гаруй хугацаа | Rating: 0.0/0
Total comments: 0
Only registered users can add comments.
[ Sign Up | Login ]