"Балхжавын дууг хэн сайн дуулах вэ” уралдаанд амжилттай оролцон олны танил болж байсан дуучин Ц.Мөнхбатыг мэргэжилтнүүд ирээдүйтэй гэж үнэлэдэг. Монголдоо уран бүтээл хийхгүй болохоор түүнийг тайзаа орхисон гэж бодсон байх. Гэтэл тэрээр өнгөрсөн хугацаанд хойд, урд хөршдөө очиж ая дуугаа өргөн мөн хувийнхаа амьдралд анхаарч сайхан гэр бүл, хөөрхөн охинтой болсон байна. Өөрөө айлын ганц хүү болоод ч тэр үү хүүхдэд маш их хайртай тэрээр уран бүтээлээ хийхийн зэрэгцээ 2-3 хүүхэдтэй болохоор төлөвлөж байгаа гэнэ. Мөн "дан ганц урлагаар хоол олж идэхэд бэрхшээлтэй” гэж ярьж буй дуучин залуу одоохондоо багахан бизнес эрхлэж, солонгос хоолны ресторан ажлуулж байгаа аж.