Өнгөрсөн долоо хоногт дотоодын спортын ертөнц үйл явдлаар харьцангүй цөөн байлаа. Спрайт хөгжлийн лигийн тоглолт үргэлжлэн явагдснаас гадна монгол бөхийн өргөөнд бүх цэргийн наадам амжилттай зохион байгуулагдсан. Энэ удаагийн бүх цэргийн наадамд хүчит 256 бөх барилдсанаас Төв аймгийн Баяндэлгэр сумын харьяат аймгийн арслан Батчулуун түрүүлж Сүхбаатар аймгийн Онгон сумын харьяат аймгийн арслан Мөнгөнбаатар үзүүрлэсэн. Энэ удаагийн бүх цэргийн наадмыг зохион байгуулагчид барилдааныг цэвэр, шударга, найраагүй байлагахын тулд олон арга хэмжээ авч байлаа.  Тухайлбал бөхчүүд танхимын дотор талын суудалд заавал суусан байх бөгөөд зөвшөөрөлгүй босож явахыг хориглож ам авч байгаа бөхийн дуудан уулзахыг хориглож байлаа. Найраа наймааны хэл амаас салахаа больсон монгол бөхийг цэвэр хүч чадлын талбар болгохын тулд хүчин чармайлт гаргасан нь сайшалтай байсан юм.  Хүчит бөхийн барилдааны нэгийн даваанд 11 залуу бөх давсан бол, тэднээс дөрөв нь хоёрын давааг гаталж гурвын даваанд гарчээ. Хилчний Б.Ядмаа, (Завхан) Б.Энхсайхан (Говь-Алтай), Э.Оюунболд (Хэнтий), Сүлдийн Н.Эрдэнэчулуун нар аманд очиж  Эрдэнэчулуун, Оюунболд нар давсан байна. Хэнтий аймгийн харьяат Энхтүвшингийн Оюунболд нас бага ч ирээдүйтэй залуу болохоо харуулж гурван арсланг өвдөглүүлээд дөрвийн даваанд Пүрэвдагва арсланд аргагүй туршлага дутан унав. Хоёрын даваанд Өвөрхангайн Гантулга начин Өмнөговийн Идэрсүрэн арсланг бариа зөрөөн дээр тун төвөггүй орхиж байлаа.
Долоон аймгийн арслан нэг аймгийн начин зургаагийн даваанд гарлаа. Хэрэв Энхжаргал давсан бол цэргийн харцага хэмээгч шинэ цолны эзэн болох байсан юм. Батчулуун арслан түүнд боломж олголгүй амлаж аваад зүүн талдаа тонгорчихов. Пүрэвдагва арслан гурав дахиа сэнжигнээс дунгуйлдаж татан давж, Мөнгөнбаатар Хашбатыг давж шөвгөрөв.
Наймын даваанд Батчулуун арслан Алдарын гурван бөхтэй үлдсэн. Давааны өмнө наймд үлдсэн бөхчүүдэд чимэг олгоход О.Баярхүүд "Зоригт”, Б.Хашбат, Н.Энхжаргал, У.Батгэрэл нарт "Өрнөх” чимэг олгов. Пүрэвдагва арслан барууныхаа магнай Мөнгөнбаатарыг авч, Батчулуун Бүрэнтөгс нар тунав. Тунасан хоёрын барилдаан шуурхай болж Батчулуун арслан бярдаж мушгиад өхийлдөж дайран мөн л ойролцоо газардсан. Харин энэ удаа Бүрэнтөгс арслан дахиж хэл ам хийгээд хэрэггүй гэж үзсэн үү шууд тахимаа өглөө. Хоёр хурц арслангийн барилдаан барьц сонгоонд хүрч Мөнгөнбаатар арслан сонгонгуут мордож түрээд давав.

Үзүүр түрүүний хоёр бөхийн барилдаан тун шуурхай болж Батчулуун арслан өмнөх даваануудын адил барилдааны санаачилгыг гартаа авч бярдаж мушгин түрүүлж өмнөх цолон дээр хурц чимэг хүртлээ. Ингэснээрээ тэр одоогийн барилдаж буй аймгийн цолтнуудынхаа манлайд эрэмбэлэгдэх болж байгаа юм. Батчулуун аймаг, цэргийн наадамд түрүүлсэн мөн дээр нь гурван аймагт үзүүрлэсэн амжилттай тул нэгд эрэмбэлэгдэхээс аргагүй юм. Харин шөвгөрсөн Пүрэвдагвад "Цогт”  П.Бүрэнтөгст "Хичээнгүй”  үзүүрлэсэн Ш.Мөнгөнбаатарт  "Бадрангуй” чимгийг тус тус олголоо.

Тунасан хоёрын барилдаан хэл ам дагууллаа

Зургаагийн даваанд Архангайн У.Батгэрэл арслан, Увсын П.Бүрэнтөгс нарын барилдаан багагүй маргаан дагуулсан. Хоёр арслангийн барилдаан бараг зэрэг шахуу унасан. Харин цэцийн шийдвэрээр тэр дор нь Бүрэнтөгсийг давуулсан. Батгэрэл арслан талбай дээр дараагийн даваа эхэлтэл хүлээсэн боловч тусыг эс олов. Монгол бөхийн өргөөнд хуран цугалсан зарим нэг нь хөлийн цэцийн шийдвэрийг эсэргүүцэж хэл амаар доромжилж, ундаа усны сав шидэж бухимдлаа илэрхийлж байлаа. Мэдээж хөлийн цэц болон засуулууд хүн болохоор алдаа гаргаж болох ч бөхчүүдийн хичээж хөдөлмөрлөсөн хөдөлмөрийг элдэв янзын ашиг сонирхолоор үгүй хийж болохгүй.

Э.Бадар-Ууган алтан медлиа мөнгөөр авсан гэнэ үү?