Улс төрийн хэргээр хэлмэгдэж, говийн халуун наранд шарагдан, тоосгон заводын тоосонд булуулж, цөлөгдөж явсан нэрт яруу найрагч Т.Галсан ээждээ зэмлүүлээд, "...Ээж минь дээ, тэмээчин болсон болохоос тэмээ болсон биш дээ” гэж хариулж байсан хэлэмгий нэгэн билээ. Харин тэр сургуульд ортлоо хэлгүй, зангаагаар ярьдаг хүүхэд байсныг хүмүүс тэр болгон мэддэггүй. Ээж нь аргаа бараад мэргэн лам дээр очиж мэргэлүүлэхэд, "Хэлгүй бүү хэл, хэл ам нь загатнасан эр болно. Төртэй ч тэрслэж төвөг удаж мэднэ. Насан хэвийхэд, нартад нэгэн од болон алдаршина” гэж хэлсэн гэдэг. Нээрээ ч сургуульд орох жилээ гэнэт хэлд оржээ.