Main » 2011 » 12-сар » 21 » В.Путины нам ялалт байгуулав
6:36 AM
В.Путины нам ялалт байгуулав

ОХУ-д өчигдөр болсон Төрийн Думын сонгуульд Ерөнхий сайд В.Путины "Нэгдмэл Орос” нам ялах нь тодорхой мэт дүр зураг харагдаж байсан ч 2007 онд олонх болж байсан шиг төгс ялалт байгуулж чадсангүй. Үүний зэрэгцээ Оросын хоёр томоохон хотод сонгуулийн луйврыг эсэргүүцсэн жагсаал хөдөлгөөн гарч, цагдаа нар 170 гаруй хүнийг баривчилсан байна. 70 хувьтай санал хураалтын дүнгээс харахад "Нэгдмэл Орос” нам 49.9 хувь, "Коммунист” нам 19.4 хувь, "Шударга Орос” нам 12.9 хувь, "Либерал Демократ” нам 11.9 хувийн санал авчээ. Төрийн Думын 450 суудлын 300 суудлыг эзэлдэг "Нэгдмэл Орос” нам энэ удаагийн сонгуулиар нэлээд суудлаа алдсан ч сонгуулийн үр дүнд хамгийн сэтгэл хангалуун байгаа хүн нь ОХУ-ын Ерөнхийлөгч Димитрий Медведев гэнэ. Тэрбээр нам нь сонгуульд дажгүй амжилт гаргалаа гээд "Нэгдмэл Орос” нам Оросын парламентын хамгийн хүчтэй, лидер нам гэдгээ дахин баталлаа” гэсэн юм. Харин Орост шийдвэр гаргадаг хамгийн нөлөө бүхий хүн гэгддэг В.Путин эдийн засгийн хямралтай, хүнд бэрх энэ цаг үед итгэл хүлээлгэсэн сонгогчдод талархлаа илэрхийлжээ. Тэрбээр "Бид олсон энэ амжилтдаа тулгуурлан улс орондоо тогтвортой хөгжлийг бий болгоно. Үүнд хувь нэмрээ оруулсан хүн болгонд талархлаа илэрхийлэхийг хүсч байна” гэжээ.

Владимир Путины нам дөрвөн жилийн өмнөх шиг ялалт байгуулж чадаагүй ч Думд олонх хэвээр үлдэнэ. Санал хураалтын дүнгээр бусад гурван нам парламентад суудал эзлэх хангалттай санал авч чадаагүй тул "Нэгдмэл Орос” нам олонх болох нь тодорхой байгаа юм. "Риа Новости” агентлагийн мэдээлснээр Москвад сонгуулийн дүнг эсэргүүцсэн 100 гаруй хүнийг баривчилсан байна. Харин Санкт-Петрбург хотод 70 гаруй эсэргүүцэгчийг баривчлан саатуулсан талаар "Интерфакс” агентлаг мэдээлсэн юм. Сөрөг хүчний цахим хуудас, радио станцууд болон сонгуулийн мониторингийн группууд онлайн дайралтад өртсөн ажээ.  Сонгуулийн бие даасан мониторингийн "Голос” байгууллага шууд утсаар сонгуулийн луйвартай холбоотой 1000 гаруй гомдол хүлээж авснаа мэдэгдсэн байна. Тус  байгууллагын вэбсайт мөн хакеруудын халдлагад өртжээ.

Ирэх жил болох ОХУ-ын Ерөнхийлөгчийн сонгуульд нэр дэвшүүлэхээ мэдэгдсэн В.Путин Барууны холбоотнуудыг сонгуульд нөлөөлж, тус улсын дотоод асуудалд хөндлөнгөөс оролцохыг оролдож байна гэж шүүмжилж байсан. Тэрбээр сонгууль болохоос өмнө Оросын ард иргэдэд хандан "Зорилготой, бодолтой хүн болгон үр хүүхдийнхээ ирээдүйн төлөө "Нэгдмэл Орос” намыг дэмжинэ гэдэгт итгэлтэй байна” гэсэн билээ. Гэвч сонгуулийн кампанит ажлын үеэр сөрөг хүчнийхэн "Нэгдмэл Орос” намыг хээл хахууль, эрх мэдлээ урвуулан ашигласан хэрэгт буруутгасан нь сонгуулийн дүнд нөлөөлсөн гэж ажиглагчид үзэж байгаа юм. Оросын Дотоод хэргийн сайдад сонгуулийн луйвартай холбоотой хэдэн зуун гомдол, гурван гэмт хэргийн мэдээлэл очсон гэнэ. Сонгуулийн өдөр саналын хуудас тарааж явсан 12 хүнийг Москвагийн цагдаа нар баривчилжээ. 

ОХУ-ын Ерөнхийлөгч Д.Медведев өнгөрсөн есдүгээр сард сонгуулийн явц, үр дүнг урьдаас таамаглаж, бүхнийг найруулан тавьдгийг буруутгаж байлаа. Гэвч үүний дараахан тэрбээр 2012 оны Ерөнхийлөгчийн сонгуульд "Нэгдмэл Орос” намаас В.Путины нэрийг дэвшүүлэхээ мэдэгдэж, үүний хариуд ноён Ерөнхий сайд "хэрэв нам нь сонгуульд ялалт байгуулбал Д.Медведевийг Засгийн газрын тэргүүнээр томилох”-оо амласан юм. Тэдний энэ мэдэгдэлд Орост чухам хэн шийдвэр гаргадаг вэ гэх эргэлзээг бүрэн арилгасан гэж болно.

Ерөнхийлөгчийн бүрэн эрхийн хоёр хугацааг үдсэн В.Путин Үндсэн хуульд "захирагдаж”, 2008 онд ОХУ-ын Ерөнхийлөгчийн суудлаас буусан. Харин тухайн жил Үндсэн хуулийн заалтад өөрчлөлт оруулж, Ерөнхийлөгчийн бүрэн эрхийн хугацааг зургаан жил болгосон нь В.Путиныг 2012 оны сонгуульд эртнээс бэлтгэж байсныг нотолсон хэрэг болсон юм. Тэрбээр хэрэв ирэх онд болох ОХУ-ын Ерөнхийлөгчийн сонгуульд ялалт байгуулбал 2024 он хүртэл ОХУ-ын №1 хүн байх боломжтой.
Category: Мэдээ мэдээлэл | Views: 904 | Added by: beatbox_battle | Tags: В.Путины нам ялалт байгуулав | Rating: 0.0/0
Total comments: 0
Only registered users can add comments.
[ Sign Up | Login ]